Bakıda avtomobil yollarının yenidən qurulması ilə əlaqədar yaxın
aylarda Nərimanov rayonu ərazisindəki «Yaşıl» və «Şərq» bazarları da
köçürüləcək. Bu barədə «Yeni Müsavat»a Bakı Şəhər İcra Hakimiyyətindəki
(BŞİH) mənbəmiz məlumat verib. Onun sözlərinə görə, hər iki bazarın
köçürülməsi paytaxtın yenidən qurulması və abadlaşdırılması ilə
bağlıdır: «Son illər maşın və adam əlindən adıçəkilən ticarət
mərkəzlərinin qarşısından keçmək mümkün deyil. İnsanlar saatlarla
tıxaclarda qalır. Post Patrul Xidmətinin əməkdaşları əraziyə cəlb
edilsə də, vəziyyəti düzəltmək mümkün deyil. Demək olar, hər gün
yarmarkaların yerləşdiyi ərazidə xoşagəlməz hadisələr baş verir. Bundan
əlavə, «Yaşıl bazar»a tonlarla gətirilən kənd təsərrüfatı məhsulları
istər-istəməz ərazini çirkləndirir. Təbii ki, şəhərin mərkəzindəki bu
cür vəziyyət yuxarı orqanları narahat etməyə bilməzdi. Elə bu səbəbdən,
adıçəkilən ticarət mərkəzlərinin köçürülməsi ilə bağlı Bakı Şəhər İcra
Hakimiyyəti başçısı Hacıbala Abutalıbova qəti tapşırıq verilib". Mənbənin
fikrincə, son ildə «Yaşıl bazar»ın bağlanmasına bir neçə dəfə təşəbbüs
göstərilib: «2000-ci ildə bazarın qapadılması təşəbbüsü ilə Bakıya yeni
mer təyin edilmiş Hacıbala Avutalıbov çıxış edib. O, hətta bazarı
antisanitariya mənbəyi kimi sökdürmək qərarına gəlib və əraziyə ağır
texnika göndərib. Amma aparılan danışıqlar nəticəsində o vaxt bazara
nəzarət edən sabiq iqtisadi inkişaf naziri Fərhad Əliyevlə dil tapıb.
Daha dəqiq desək, nazir tabeçiliyindəki «Şərq bazarı»nı Hacıbala
müəllimə bağışlayıb. Hazırda bazarı merin Heydər adlı kürəkəni
fırladır. Fərhad Əliyev vurulduqdan sonra isə «Yaşıl bazar» onun
həmyerlisi, hazırda əmlak məsələləri üzrə Dövlət Komitəsinin rəhbəri
Kərəm Həsənovun tabeçiliyindədir". Əldə etdiyimiz məlumata görə,
həqiqətən «8-ci kilometr» bazarındakı sənaye yarmarkası və «Yaşıl
bazar» K.Həsənovun kurasiyasındadır. Amma paytaxt yollarının yenidən
qurulması və təmiri Nəqliyyat Nazirliyinə həvalə edildiyindən, sonradan
vəziyyət kökündən dəyişib. Belə ki, şəhərdə avtomobil tıxaclarının
aradan qaldırılması məqsədi ilə iri ticarət mərkəzlərinin yerinin
dəyişdirilməsi zərurəti meydana çıxıb. Artıq bununla bağlı xüsusi
proqram da hazırlanıb. Proqrama əsasən, Bakıda maşınların hərəkətinə
ciddi maneə olan «8-ci kilometr», «Xalqlar Dostluğu», «Laçın», «Yaşıl
bazar», «Şərq bazarı» kimi ticarət mərkəzləri paytaxtın müxtəlif
ərazilərinə köçürüləcək.